गोदावरी नदीत आढळला दुर्मीळ अहिर मासा;

गोदावरी नदीत आढळला दुर्मीळ अहिर मासा;

कमालपूर येथे मासेमारी करणाऱ्या युवकाला सापडला मासा

श्रीरामपूर (प्रतिनिधी)-

श्रीरामपूर तालुक्यातील कमालपूर येथे गोदावरी नदीच्या जायकवाडी धरणाच्या बॅक वॉटरच्या पाण्यात मासेमारी करत असलेल्या युवकाच्या जाळ्यात औषधी गुणधर्म असलेला दुर्मिळ असा अहीर मासा सापडला आहे. हा मासा सुमारे साडेतीन फुट लांब व सव्वा पाच किलो वजनाचा आहे.याच तरुणाला गोदावरी नदीतच हा मासा 7-8 वर्षानंतर पुन्हा एकदा सापडला आहे.

आदिवासी समाजाच्या मासेमारी व्यवसाय करणाऱ्या कमालपूर येथील दीपक बर्डे यांच्या जाळ्यात हा दुर्मीळ मासा सापडला आहे.हा मासा पाण्याच्या तळाला रेती किंवा चिखलात राहतो. तोंडापासून शेपटीपर्यंत तो सतत चिकट स्राव सोडत असतो. हातात येवूनही तो यामुळे सहज निसटून पुन्हा पाण्यात जातो. असे असताना या युवकाने हा मासा शिताफीने पकडून नदी काठावर आणला. त्याच्या अंगावरील चिकट द्रवसुध्दा औषधी असते.दुर्मिळ असलेला अहीर मासा सुमारे सहा ते सात हजार रुपये किलोच्या भावाने विकला जातो.परदेशातही त्यास मोठी मागणी असते.अहीर हा मासा सापासारखा लांब, जाडसर असतो. तोंड पुढच्या टोकाला, खालचा आणि वरचा ओठ थोडासा जाडसर, नाकाचा भाग अर्धवतरुळाकार अस असतो. तोंडामध्ये त्रिकोणी आकाराचे दात एका ओळीत दिसतात. इतर माशांमध्ये जसे वेगवेगळे पर दिसतात, तसे याच्यात एकच पर पाठीपासून चालू होतो. तो शेपटीच्या परापर्यंत असा एकच होऊन जातो. शरीराच्या खालच्या बाजूला खांद्याजवळ छोटे पर असतात.

हा मासा पाण्याच्या बाहेरसुद्धा खूप वेळ जिवंत राहू शकतो. याच्या शरीरात हवेची पिशवी असते. पाण्याच्या बाहेर या पिशवीतील ऑक्सिजनचा वापर तो श्‍वसनासाठी करत असतो. पाण्याबाहेर काढल्यानंतर या माशाच्या त्वचेतून खूप स्राव स्रवत असतो.तो इतका बुळबुळीत असतो, की मासा हातातून कधी सटकतो, ते कळतही नाही.हा मासा नीरा,भीमा,इंद्रायणी,घोड व मुळा या नद्यांच्या पात्रात प्रामुख्याने सापडतो.परंतु अलीकडच्या काळात हा मासा गोदावरी नदीत जायकवाडी धरणाच्या बॅक वॉटरमध्ये सापडू लागला आहे.काही काळापूर्वी नेवासा तालुक्यातील प्रवरा संगम परिसरातिल काही मासेमारी करणाऱ्या युवकांनाही हा मासा सापडला होता.